Yollarda Təhlükəsizliyin Görünməyən Tərəfi – Anar Cəfərovun Məsuliyyətli Xidməti

• 5-10-2026, 10:00
• sosial
• 0

Yol təhlükəsizliyi yalnız sürücünün sükan arxasında qaydalara əməl etməsi ilə məhdudlaşmır. Avtomobilin texniki cəhətdən saz vəziyyətdə olması, nəqliyyat vasitələrinin müəyyən edilmiş təhlükəsizlik tələblərinə cavab verməsi və texniki nasazlıqların vaxtında müəyyənləşdirilməsi də insanların həyat və sağlamlığının qorunmasında mühüm rol oynayır. Baş Dövlət Yol Polisi İdarəsinin Texniki Baxış Şöbəsinin rəisi Anar Cəfərovun rəhbərlik etdiyi fəaliyyət istiqamətinin məsuliyyəti də məhz buradan qaynaqlanır. Burada görülən hər bir işin arxasında yollarda təhlükəsiz hərəkətin təmin olunması kimi böyük ictimai əhəmiyyət daşıyan məqsəd dayanır.

Texniki baxış ilk baxışdan sırf texniki prosedur təsiri bağışlasa da, əslində yol hərəkəti təhlükəsizliyinin mühüm elementlərindən biridir. Əyləc sistemindən sükan idarəetməsinə, işıq cihazlarından avtomobilin digər təhlükəsizlik elementlərinə qədər nəqliyyat vasitəsinin texniki vəziyyətinin düzgün qiymətləndirilməsi mümkün qəzaların qarşısının alınmasına xidmət edir. Anar Cəfərovun rəhbərlik etdiyi sahədə də əsas məsuliyyət texniki baxış prosesinin qanunvericiliyin tələblərinə uyğun, dəqiq və sistemli şəkildə təşkil edilməsidir. Bu işdə səhlənkarlığa yer olmaması isə vəzifənin nə qədər ciddi məsuliyyət tələb etdiyini göstərir.

Anar müəllimin fəaliyyətini səciyyələndirən mühüm cəhətlərdən biri rəhbərlik etdiyi sahədə nizam-intizam və peşəkarlığın ön planda tutulmasıdır. Texniki baxış prosesində obyektivliyin qorunması, müəyyən edilmiş standartların hər bir nəqliyyat vasitəsinə eyni şəkildə tətbiq edilməsi və işin düzgün təşkili rəhbərdən həm peşəkar hazırlıq, həm də güclü təşkilatçılıq bacarığı tələb edir. Vətəndaşın xidmət prosesində lazımsız vaxt itkisi ilə üzləşməməsi, müraciətlərin qanun çərçivəsində və operativ şəkildə həll olunması da müasir dövlət xidmətinin vacib prinsiplərindəndir.

Yollarda hərəkət edən minlərlə nəqliyyat vasitəsinin texniki sazlığı bütövlükdə cəmiyyətin təhlükəsizliyinə təsir göstərir. Bəzən ilk baxışda kiçik görünən bir texniki nasazlıq ağır yol-nəqliyyat hadisəsinin səbəbinə çevrilə bilər. Buna görə texniki baxışa formal prosedur deyil, qabaqlayıcı təhlükəsizlik tədbiri kimi yanaşmaq son dərəcə vacibdir. Anar Cəfərovun rəhbərlik etdiyi istiqamətdə həyata keçirilən işlərin əhəmiyyəti də burada özünü göstərir: məqsəd yalnız avtomobilin texniki vəziyyətini müəyyənləşdirmək deyil, potensial təhlükənin yola çıxmadan qarşısını almaqdır.

Bu sahədə rəhbər vəzifə daşımaq həm də böyük kollektivin fəaliyyətinin düzgün koordinasiya edilməsini tələb edir. Əməkdaşların peşə hazırlığına, xidməti intizama, vətəndaşlarla etik davranışa və qanunvericiliyin tələblərinə riayət olunmasına nəzarət gündəlik fəaliyyətin mühüm hissəsidir. Anar müəllimin idarəçilik yanaşmasında tələbkarlıqla məsuliyyətin vəhdəti xüsusi əhəmiyyət daşıyır. Çünki rəhbərin yaratdığı iş mühiti son nəticədə həm xidmətin keyfiyyətinə, həm də vətəndaşın dövlət qurumuna münasibətinə təsir göstərir.

Anar Cəfərovun fəaliyyət sahəsində insanlarla ünsiyyət məsələsi də az əhəmiyyət daşımır. Texniki baxış məntəqələrinə müxtəlif peşə və yaş qruplarından minlərlə sürücü müraciət edir. Hər bir vətəndaşa qanunun tələblərinin aydın izah edilməsi, yaranmış məsələlərə diqqətlə yanaşılması və xidmət mədəniyyətinin qorunması dövlət-vətəndaş münasibətlərinin mühüm göstəricilərindəndir. Rəhbərlik səviyyəsində belə yanaşmanın təşviq edilməsi həm iş prosesinin səmərəliliyini artırır, həm də qarşılıqlı etimadın möhkəmlənməsinə xidmət edir.

Müasir dövrdə avtomobil texnologiyalarının sürətlə dəyişməsi texniki nəzarət sahəsinin də daim yenilənməsini zəruri edir. Yeni təhlükəsizlik sistemləri, elektron idarəetmə mexanizmləri, hibrid və elektrik avtomobillərinin geniş yayılması bu sahədə çalışan mütəxəssislərdən biliklərini davamlı olaraq təkmilləşdirməyi tələb edir. Anar müəllimin rəhbərlik etdiyi istiqamətin qarşısında duran mühüm vəzifələrdən biri də texniki baxış prosesinin müasir nəqliyyat vasitələrinin xüsusiyyətlərinə uyğun şəkildə təşkil olunması, peşəkarlığın qorunması və yeni çağırışlara çevik münasibət göstərilməsidir.

Dövlət xidmətində çalışan rəhbəri fərqləndirən mühüm keyfiyyətlərdən biri də cəmiyyətin həssas təbəqələrinə münasibətidir. Şəhid ailələri və qazilərimizə hörmət və diqqət xalqımız üçün xüsusi mənəvi məna daşıyır. Vətənimizin ərazi bütövlüyü və suverenliyi uğrunda canından keçən şəhidlərimizin ailələrinə ehtiram göstərilməsi, sağlamlığını Vətən yolunda itirmiş qazilərimizin müraciətlərinə həssaslıqla yanaşılması hər bir dövlət qulluqçusu üçün mənəvi məsuliyyətdir. Anar Cəfərovun fəaliyyətində də bu ali dəyərlərə hörmətin, şəhid ailələri və qazilərə həssas münasibətin ön planda dayanması onun rəhbər və vətəndaş mövqeyinin mühüm göstəricilərindən biri kimi dəyərləndirilə bilər.

Dövlət Yol Polisi sistemində xidmət etmək qanunun aliliyinə, ictimai təhlükəsizliyə və vətəndaş məsuliyyətinə xidmət etmək deməkdir. Texniki Baxış Şöbəsi isə bu böyük sistemin yollara çıxan avtomobillərin təhlükəsizlik tələblərinə uyğunluğuna nəzarət edən mühüm istiqamətlərindən biridir. Anar Cəfərovun üzərinə düşən məsuliyyət də təkcə inzibati rəhbərlikdən ibarət deyil. Burada qəbul olunan hər düzgün qərar, vaxtında müəyyən edilən hər ciddi nasazlıq və yüksək səviyyədə təşkil olunan hər xidmət prosesi ümumi yol təhlükəsizliyinə verilən töhfəyə çevrilir.

Baş Dövlət Yol Polisi İdarəsinin Texniki Baxış Şöbəsinin rəisi Anar Cəfərovun fəaliyyətini səciyyələndirən əsas məqam məsuliyyətli dövlət xidmətinin mahiyyətini gündəlik işdə qorumaqdır. Peşəkarlıq, prinsipiallıq, vətəndaşa hörmət, kollektivdə nizam-intizam və dövlət qarşısında məsuliyyət bir rəhbərin fəaliyyətinə dəyər qazandıran başlıca xüsusiyyətlərdir. Yol təhlükəsizliyinin görünməyən, lakin son dərəcə vacib hissəsində görülən bu işlərin nəticəsi isə çox sadə, eyni zamanda çox böyük bir məqsədə xidmət edir: insanların yollarda daha təhlükəsiz hərəkət etməsinə və hər bir sürücünün mənzil başına sağ-salamat çatmasına.

Baş Dövlət Yol Polisi İdarəsinin Texniki Baxış Şöbəsinin rəisi Anar Cəfərov - Azərbaycan xalqının yaddaşında böyük tarixi, siyasi və mənəvi əhəmiyyət daşıyan günlərdən biri kimi yazılan 4 oktyabr 2020-ci il tarixi Cəbrayıl şəhərinin Ermənistan silahlı qüvvələrinin işğalından azad edilməsi ilə Azərbaycan dövlətinin ərazi bütövlüyünün bərpası istiqamətində mühüm mərhələnin başlanmasını simvolizə edir.

Cəbrayıl rayonu 23 avqust 1993-cü ildə Ermənistan silahlı qüvvələri tərəfindən işğal edilmiş, işğal nəticəsində rayonun yaşayış məntəqələri dağıdılmış, əhalisi doğma yurdlarından didərgin salınmış, tarixi-mədəni irsinə ciddi ziyan vurulmuşdur. Cəbrayıl sakinləri uzun illər ərzində doğma torpaqlarına qayıtmaq arzusu ilə yaşamışlar. İşğal dövründə Cəbrayılın şəhər və kəndlərində yaşayış infrastrukturu, sosial obyektlər və mədəni irs nümunələri böyük dağıntılara məruz qalmışdır

Cəbrayıl şəhərinin azad edilməsi 44 günlük Vətən müharibəsinin ən mühüm hadisələrindən biri olmuşdur. Prezident cənab İlham Əliyevin qeyd etdiyi kimi, Cəbrayıl həmin müharibə zamanı işğaldan azad edilən ilk şəhər olmuşdur. Bu baxımdan Cəbrayılın azadlığı Azərbaycan Ordusunun Zəfər yürüşündə xüsusi yer tutur.

2020-ci il sentyabrın 27-də başlayan Vətən müharibəsinin ilk günlərindən Azərbaycan Ordusu əks-hücum əməliyyatları həyata keçirərək bir sıra yaşayış məntəqələrini işğaldan azad etmişdir. Cəbrayıl istiqamətində aparılan uğurlu hərbi əməliyyatlar nəticəsində əvvəlcə rayonun kəndləri azad edilmiş, 4 oktyabrda isə Cəbrayıl şəhərinin azad olunması təmin edilmişdir. Bu hadisə Azərbaycan Ordusunun hərbi imkanlarının, şəxsi heyətin döyüş ruhunun və peşəkarlığının mühüm göstəricilərindən biri kimi tarixə düşmüşdür.

Cəbrayılın azad edilməsinin tarixi əhəmiyyətini artıran mühüm hadisələrdən biri də Xudafərin körpüsünün yerləşdiyi ərazinin azad olunmasıdır. Xudafərin ərazisinin azad olunması və burada Azərbaycan bayrağının qaldırılması Zəfər tarixinin mühüm səhifələrindən biri kimi yaddaşlara həkk olunmuşdur.

Xudafərin körpüsü Azərbaycan xalqının çoxəsrlik tarixinin, mədəni irsinin və bölgənin tarixi-mədəni coğrafiyasının mühüm nümunələrindəndir. Buna görə Cəbrayılın azadlığı təkcə hərbi hadisə deyil, həm də tarixi-mədəni irsin qorunması və gələcək nəsillərə çatdırılması baxımından xüsusi əhəmiyyət daşıyır.

Azərbaycan Respublikası Prezidenti cənab İlham Əliyevin 31 iyul 2023-cü il tarixli Sərəncamı ilə hər il 4 oktyabrın Cəbrayıl Şəhəri Günü kimi qeyd olunması təsis edilmişdir. Cəbrayıl Şəhəri Gününün təsis edilməsi həm də 4 oktyabr 2020-ci il tarixində baş vermiş tarixi hadisənin dövlət səviyyəsində əbədiləşdirilməsi baxımından mühüm addımdır.

Cəbrayılın azad edilməsindən sonra qarşıda duran əsas vəzifələrdən biri şəhərin və rayonun bərpası, müasir infrastrukturun yaradılması və keçmiş məcburi köçkünlərin öz doğma yurdlarına qayıdışının təmin edilməsidir. İşğaldan azad edilmiş ərazilərdə həyata keçirilən genişmiqyaslı bərpa və quruculuq işləri çərçivəsində Cəbrayıl şəhərində də yaşayış binaları, sosial obyektlər, yollar və digər infrastruktur layihələri həyata keçirilir. Cəbrayıl yeni inkişaf mərhələsinə qədəm qoymuş və sakinlərin doğma yurda qayıdışı təmin edilmişdir. Bu proses yalnız fiziki infrastrukturun yenilənməsi ilə məhdudlaşmır. Məqsəd Cəbrayılın tarixi simasının qorunması, müasir şəhər mühitinin formalaşdırılması, sosial və iqtisadi imkanların genişləndirilməsi və burada dayanıqlı yaşayış üçün şərait yaradılmasıdır.

Bu gün Cəbrayılın adı həm Zəfər, həm də Böyük Qayıdış anlayışları ilə sıx bağlıdır. 2025-ci ildə Cəbrayıl şəhərində Şəhər Günü artıq sakinlərin doğma yurdda iştirakı ilə qeyd edilmiş, tədbirlər çərçivəsində şəhərin qədim və müasir tarixini əks etdirən sərgilər, mədəni proqramlar və müxtəlif tədbirlər keçirilmişdir. Bu cür tədbirlər tarixi yaddaşın qorunmasına, gənc nəslin vətənpərvərlik ruhunda tərbiyəsinə, Cəbrayılın mədəni irsinin tanıdılmasına və doğma yurda qayıdışın ictimai əhəmiyyətinin vurğulanmasına xidmət edir.

4 Oktyabr – Cəbrayıl Şəhəri Günü Azərbaycan xalqının uzun illər ərzində doğma torpaqlara qayıdış arzusunun, Vətən müharibəsində əldə olunmuş Zəfərin və işğaldan azad edilmiş ərazilərdə yeni həyatın başlanmasının rəmzlərindən biridir. Cəbrayılın tarixi gənc nəslə çatdırılmalı, onun mədəni irsi qorunmalı və şəhərin müasir inkişafı ilə tarixi kimliyi arasında bağlılıq təmin edilməlidir. Bu baxımdan Cəbrayıl Şəhəri Günü həm keçmişə ehtiram, həm də gələcəyə baxış xarakteri daşıyır.

Hörmətlə: Hatəm Allahverdiyev