Şəhidlərimizin qəhrəmanlığı və fədakarlığı xalqımızın yaddaşında əbədi yaşayacaq

27 Sentyabr – Anım Günü Azərbaycan xalqının yaddaşında xüsusi mənəvi əhəmiyyət daşıyan günlərdən biridir. Bu gün Vətənimizin ərazi bütövlüyü və suverenliyi uğrunda canından keçən şəhidlərimizin əziz xatirəsi dərin ehtiramla yad edilir. Hər il sentyabrın 27-nin Anım Günü kimi qeyd olunması Azərbaycan Respublikasının Prezidenti İlham Əliyevin 2 dekabr 2020-ci il tarixli Sərəncamı ilə təsbit edilmişdir.⁠
2020-ci il sentyabrın 27-də başlayan Vətən müharibəsi Azərbaycan tarixinin ən mühüm səhifələrindən birinə çevrildi. 44 gün davam edən müharibə xalqımızın birliyini, ordumuzun gücünü və əsgər-zabitlərimizin misilsiz qəhrəmanlığını bütün dünyaya göstərdi. Bu tarixi Zəfərin arxasında Vətən sevgisi, milli həmrəylik və böyük fədakarlıq dayanır. Azərbaycan xalqı həmin günlərdə “bir yumruq” kimi birləşərək öz əsgərinin yanında oldu.⁠
Bu mübarizənin ən ağır yükünü isə Vətən uğrunda canını fəda edən şəhidlərimiz daşıdı. Onların hər birinin həyat yolu, göstərdiyi şücaət və Vətən sevgisi gələcək nəsillər üçün örnəkdir. Məhz buna görə Anım Günü yalnız keçmişi xatırlamaq deyil, həm də şəhidlərimizin bizə miras qoyduğu Vətən sevgisini qorumaq və gələcək nəsillərə ötürmək məsuliyyətidir.
Azərbaycan Respublikasının Prezidenti, Müzəffər Ali Baş Komandan cənab prezident İlham Əliyev də müxtəlif çıxışlarında şəhidlərimizin qəhrəmanlığının və fədakarlığının heç vaxt unudulmayacağını vurğulayıb. Dövlət başçısının sözləri ilə desək, bu Qələbəni Azərbaycan xalqına bəxş edən qəhrəman əsgər və zabitlər xalqımızın qürur mənbəyidir.⁠
Vətən uğrunda mübarizənin tarixi kökləri isə daha əvvələ gedib çıxır. Ulu öndər Heydər Əliyevin dövlətçilik siyasətində Azərbaycanın ərazi bütövlüyünün bərpası məsələsi xüsusi yer tuturdu. Ulu öndərin yaratdığı və inkişaf etdirdiyi güclü ordu, dövlətçilik ənənələri və milli həmrəylik sonrakı dövrdə Azərbaycanın öz tarixi hədəflərinə çatmasında mühüm rol oynadı.⁠
Anım Günü həm də bizə müharibənin ağrılarını xatırladır. Şəhid ailələrinin, qazilərin və müharibədən zərər çəkmiş insanların yanında olmaq hər birimizin mənəvi borcudur. Azərbaycan dövləti şəhid ailələrinə və qazilərə müxtəlif istiqamətlərdə dəstək göstərir və onların rifahının yaxşılaşdırılmasına xüsusi diqqət yetirir.
Bu gün məktəblərdə, ailələrdə və cəmiyyətdə şəhidlərimizin xatirəsinin yaşadılması xüsusilə əhəmiyyətlidir. Çünki Vətən sevgisi yalnız sözlə deyil, tariximizi öyrənməklə, şəhidlərimizin həyat və döyüş yoluna hörmətlə yanaşmaqla, ölkəmizin gələcəyi üçün məsuliyyətli vətəndaş olmaqla nümayiş etdirilir.
27 Sentyabr – Anım Günü bizə bir daha xatırladır ki, xalqın yaddaşında şəhidlərin adı daim yaşayır. Onların göstərdiyi qəhrəmanlıq və fədakarlıq Azərbaycan tarixinin şərəfli səhifələrindən biridir. Şəhidlərimizin ruhu qarşısında baş əyir, onların əziz xatirəsini dərin ehtiramla yad edirik.
213 nömrəli məktəb-liseyin 
Azərbaycan dili və ədəbiyyat müəllimi 
Abbasova Məsumə